Novruz bayramı əsrlər boyu qorunub saxlanılan və nəsildən-nəslə ötürülən ən qədim milli bayramlarımızdan biridir. Bu bayramın kökləri qədim Şərq mədəniyyətinə və insanların təbiətlə bağlı inanc və düşüncələrinə əsaslanır.

Qədim dövrlərdə insanlar baharın gəlişini həyatın yenilənməsi kimi qəbul edirdilər. Torpağın oyanması, ağacların çiçək açması, günəşin daha çox istilik bəxş etməsi yeni ümidlərin başlanğıcı sayılırdı. Məhz buna görə də Novruz bayramı yalnız təbiətin deyil, həm də insanların ruhunun yenilənməsi bayramı hesab olunur.

Novruz ərəfəsində insanlar evlərini təmizləyir, həyətlərini səliqəyə salır və bayram süfrəsi hazırlayırlar. Bayram süfrəsinin əsas rəmzlərindən biri səmənidir. Səməni həyatın, bolluğun və dirçəlişin simvoludur. Bundan əlavə, yumurta boyamaq, tonqal qalamaq, papaq atmaq kimi maraqlı və qədim adətlər də Novruz bayramının ayrılmaz hissəsidir.

Bu bayram insanları bir araya gətirən, dostluq və mehribanlığı gücləndirən xüsusi bir gündür. İnsanlar bir-birinə qonaq gedir, böyük-kiçik hər kəs bayram sevincini bölüşür.

Novruz bayramı münasibətilə hər kəsi ürəkdən təbrik edir, həyatınıza sevinc, ailələrinizə xoşbəxtlik və firavan günlər arzulayırıq. Qoy baharın gəlişi hər biriniz üçün yeni uğurların başlanğıcı olsun!

Hatəm İbrahimov,
Xeyriyyəçi- İş adamı