Novruz bayramı Azərbaycan xalqının milli-mənəvi dəyərlərinin, qədim adət-ənənələrinin ən gözəl nümunələrindən biridir. Bu bayram əsrlər boyu xalqımızın həyatında xüsusi yer tutmuş və zaman keçdikcə daha da zənginləşmişdir.

Tarixi mənbələr göstərir ki, Novruz bayramı qədim dövrlərdən bəri geniş ərazilərdə qeyd olunub. Bu bayram baharın gəlişi ilə yanaşı, yeni ilin başlanğıcı kimi də qəbul edilirdi. İnsanlar Novruz günlərində köhnə ilin çətinliklərini geridə qoyaraq yeni ilə ümid və nikbinliklə qədəm qoyurdular.

Novruz bayramının ən gözəl xüsusiyyətlərindən biri də insanların bir-birinə mehribanlıq göstərməsidir. Bayram günlərində küsülülər barışır, insanlar ehtiyacı olanlara kömək edir, qapılar qonaqlar üçün açıq olur. Bu isə Novruzun təkcə bayram deyil, həm də mənəvi dəyərlər məktəbi olduğunu göstərir.

Səməni, boyanmış yumurtalar, şirniyyatlarla bəzədilmiş bayram süfrəsi Novruzun ən gözəl atributlarından sayılır. Tonqalların qalanması isə qədim inanclara görə insanları pisliklərdən qoruyur və yeni ilin uğurlu olmasını simvolizə edir.

Bahar bayramı münasibətilə hər birinizi səmimi qəlbdən təbrik edir, həyatınızda sevinc, xoşbəxtlik və uğurlar arzulayırıq. Qoy Novruz hər evə nur, bərəkət və əmin-amanlıq gətirsin!

Vüsalə Məmmədova
229 saylı tam orta məktəbin direktoru