Tarix sübut edir ki, hər bir xalqın taleyində onun gələcəyini müəyyənləşdirən həlledici məqamlar olur. Azərbaycan xalqı üçün 15 İyun – Milli Qurtuluş Günü məhz belə tarixi günlərdəndir. Bu gün ölkəmizin müstəqilliyini qoruyub saxlamasının, dövlətçiliyini möhkəmləndirməsinin və sabit inkişaf yolunu seçməsinin rəmzi kimi böyük ehtiramla qeyd edilir.
1993-cü ildə Azərbaycan ağır sınaqlarla üz-üzə idi. Daxildə siyasi qarşıdurmalar, iqtisadi tənəzzül və idarəetmədə yaranmış böhran dövlətçiliyimizi ciddi təhlükə qarşısında qoymuşdu. Həmin çətin günlərdə xalqın çağırışına cavab verən ümummilli lider Heydər Əliyevin yenidən hakimiyyətə qayıdışı ölkədə vəziyyətin sabitləşməsinə, qanunun aliliyinin təmin edilməsinə və dövlət institutlarının gücləndirilməsinə imkan yaratdı.
Milli Qurtuluş Günü Azərbaycan tarixində yalnız siyasi hadisə kimi deyil, həm də xalqın milli həmrəyliyinin və dövlətə sədaqətinin təntənəsi kimi qiymətləndirilir. Məhz bu gündən sonra ölkədə genişmiqyaslı islahatlara start verildi, iqtisadi inkişafın əsasları formalaşdırıldı, beynəlxalq əməkdaşlıq genişləndirildi və Azərbaycan etibarlı tərəfdaş kimi dünya birliyində öz layiqli yerini tutdu.
Bu gün müstəqil Azərbaycan regionun güclü dövlətlərindən biri kimi tanınır, mühüm beynəlxalq layihələrin təşəbbüskarı və iştirakçısıdır. Dövlətimizin əldə etdiyi bu uğurların əsasında xalqın birliyi, milli maraqlara sadiqlik və düzgün inkişaf strategiyası dayanır.
15 İyun hər bir azərbaycanlı üçün yalnız keçmişə hörmət günü deyil, həm də gələcəyə böyük ümid və inamla baxmaq günüdür. Bu əlamətdar tarix bizə dövlətçiliyin qorunmasının, milli həmrəyliyin və vətən sevgisinin əvəzsiz dəyər olduğunu bir daha xatırladır.
15 İyun – Milli Qurtuluş Günü münasibətilə bütün xalqımızı ürəkdən təbrik edir, Uca Allahdan doğma Azərbaycanımıza daim sülh, əmin-amanlıq, inkişaf, qüdrət, xalqımıza isə sağlamlıq, xoşbəxtlik və firavan ömür arzulayırıq. Milli Qurtuluş Gününüz mübarək!


Rahim Novruzov
Dağlıq Şirvan Regional Təhsil İdarəsinin müdir müavini