Azərbaycanın müasir tarixində 15 İyun – Milli Qurtuluş Günü xalqımızın taleyini dəyişən ən əlamətdar hadisələrdən biri kimi xüsusi yer tutur. Bu gün ölkəmizin müstəqilliyinin qorunub saxlanılması, dövlət idarəçiliyində sabitliyin bərqərar olması və Azərbaycanın inkişaf yoluna qədəm qoymasının rəmzi hesab olunur.
1993-cü ilin iyun ayında Azərbaycan mürəkkəb siyasi vəziyyətlə üz-üzə idi. Daxili çəkişmələr, hakimiyyət böhranı və ölkədə yaranmış gərginlik dövlət müstəqilliyini ciddi təhlükə qarşısında qoymuşdu. Belə bir tarixi məqamda xalqın iradəsi ilə ümummilli lider Heydər Əliyevin yenidən siyasi rəhbərliyə qayıdışı ölkədə sabitliyin bərpasına və dövlətçiliyin möhkəmləndirilməsinə imkan yaratdı.
Milli Qurtuluş Günü Azərbaycanın yeni inkişaf mərhələsinin başlanğıcı oldu. Həmin dövrdən etibarən ölkədə hüquqi dövlət quruculuğu sürətləndirildi, iqtisadi islahatlar həyata keçirildi, sosial rifahın yüksəldilməsi istiqamətində mühüm addımlar atıldı və milli maraqlara əsaslanan uğurlu dövlət siyasəti formalaşdırıldı. Azərbaycanın beynəlxalq nüfuzu yüksəldi, ölkəmiz mühüm enerji və nəqliyyat layihələrinin əsas iştirakçılarından birinə çevrildi.
Bu tarixi gün həm də xalqın öz dövlətinə olan sədaqətinin, milli həmrəyliyinin və vətən sevgisinin ifadəsidir. Milli Qurtuluş Günü bizə öyrədir ki, dövlətin gücü ilk növbədə xalqın birliyindən, vətəninə bağlılığından və milli maraqlara xidmət edən siyasətdən qaynaqlanır.
Bu gün müasir Azərbaycan siyasi sabitliyi, güclü iqtisadiyyatı, beynəlxalq nüfuzu və əldə etdiyi uğurlarla regionun aparıcı dövlətlərindən biri kimi inkişafını davam etdirir. Bu nailiyyətlərin əsasında isə 15 İyun tarixində əsası qoyulan dövlətçilik prinsipləri dayanır.
Milli Qurtuluş Günü hər bir azərbaycanlı üçün keçmişə ehtiram, bu günə qürur və gələcəyə böyük inam hissi yaradan müqəddəs bir tarixdir. Bu əlamətdar gün milli həmrəyliyimizin və dövlətçiliyimizin əbədi yaşayacağının rəmzidir.
15 İyun – Milli Qurtuluş Günü münasibətilə bütün Azərbaycan xalqını səmimi qəlbdən təbrik edir, Uca Allahdan dövlətimizə daim qüdrət, xalqımıza birlik, əmin-amanlıq, bol ruzi-bərəkət və firavan həyat arzulayırıq. Milli Qurtuluş Gününüz mübarək!
Dilqəm Məhərrəmov
Plastik, estetik, rekonstruktiv cərrah