Türkiyə Səudiyyə Ərəbistanını husi hücumlarından qorumaqda dəstəkləməyə hazırdır, lakin Yəməndəki şiə hərəkatına qarşı hücum əməliyyatlarında iştirak etmək niyyətində deyil.
Bu barədə "Al-Monitor" adı açıqlanmayan bir türk rəsmisinə istinadən məlumat yayıb.
Sentyabrın 26-da Türkiyə Baş Qərargah rəisi Səlcuq Bayraktaroğlu Səudiyyə Ərəbistanına səfər edib və orada səudiyyəli həmkarı Fəyyad bin Həmid əl-Ruveyli və Pakistan Ordu rəisi Asim Munir ilə görüşüb. Danışıqlar Husilərin krallığa hücumlarının gücləndiyi bir vaxtda baş tutub.
"Məkkə müqaviləsi müdafiə paktıdır", - deyən türk rəsmisi, Səudiyyə Ərəbistanı ərazisini hücumdan qorumağın Yəməndəki vətəndaş müharibəsində birbaşa iştirakdan fərqli olduğunu vurğulayıb.
Türkiyə diplomatik mənbəyinin məlumatına görə, Türkiyə, Səudiyyə Ərəbistanı və Pakistanın xarici işlər nazirləri Nyu-Yorkda saziş çərçivəsində hərbi əməkdaşlığın institusionallaşdırılmasına hazırlıqları müzakirə ediblər. Birinci mərhələ Ər-Riyadda daimi katibliyin və birgə hərbi qərargahın yaradılmasını əhatə edir.
Yaxın Şərq İnstitutunun eksperti Gönül Tolun sözlərinə görə, Ankara, çox güman ki, təlim, kəşfiyyat paylaşımı və texniki yardım sahələrində Səudiyyə Ərəbistanına dəstək verməklə məhdudlaşacaq və həmçinin hava hücumundan müdafiə və pilotsuz təyyarələrə qarşı müdafiə sahəsində də kömək göstərə bilər.
"Al-Monitor"un qeyd etdiyi kimi, Türkiyənin husilərə qarşı hücum əməliyyatlarında birbaşa iştirakı, Somalidəki hərbi və iqtisadi mövcudluğu da daxil olmaqla, Qırmızı dənizdə və Afrika Buynuzunda Türkiyənin maraqları üçün risk yarada bilər.
Əlavə bir amil Türkiyənin husiləri dəstəkləyən İranla münasibətləri olaraq qalır. Tolun sözlərinə görə, Ankara Tehranla diplomatik və iqtisadi əlaqələri qorumaqda maraqlıdır və buna görə də, çox güman ki, İranın dəstəklədiyi hərəkatla birbaşa hərbi qarşıdurmadan qaçmağa çalışacaq.