10 May Azərbaycan xalqı üçün müqəddəs və əziz tarixlərdən biridir. Bu gün dünya şöhrətli siyasətçi, dahi dövlət xadimi, Azərbaycan xalqının Ümummilli Lideri Heydər Əliyevin doğum günüdür.
Heydər Əliyev yalnız Azərbaycanın deyil, bütün türk dünyasının böyük liderlərindən biri kimi tarixə düşmüşdür. O, ölkəmizin inkişafı, dövlət müstəqilliyinin möhkəmləndirilməsi və xalqın rifahı üçün yorulmadan çalışmışdır. Onun zəngin dövlətçilik təcrübəsi və siyasi müdrikliyi Azərbaycanı böyük təhlükələrdən qoruyaraq inkişaf yoluna çıxarmışdır.
1990-cı illərin əvvəllərində Azərbaycan çox ağır vəziyyətdə idi. Ölkədə siyasi böhran hökm sürür, vətəndaş qarşıdurması təhlükəsi artırdı. Dövlət müstəqilliyi ciddi təhlükə altında idi. Belə bir çətin zamanda xalqın tələbi ilə hakimiyyətə qayıdan Heydər Əliyev Azərbaycanı böyük faciələrdən xilas etdi.
Ulu Öndərin rəhbərliyi altında ölkədə hüquqi dövlət quruculuğu prosesi başladı. Yeni Konstitusiya qəbul olundu, demokratik islahatlar həyata keçirildi və ölkədə ictimai-siyasi sabitlik təmin edildi. Azərbaycanın beynəlxalq əlaqələri genişləndi və ölkəmizin dünya arenasındakı mövqeyi gücləndi.
Heydər Əliyev hər zaman təhsilə, elmə və gənclərə xüsusi önəm verirdi. O hesab edirdi ki, güclü dövlətin təməlində savadlı və vətənpərvər gənclər dayanmalıdır. Buna görə də gənclərin inkişafı istiqamətində mühüm proqramlar həyata keçirilmişdir.
Bu gün Azərbaycan xalqı böyük qürur hissi ilə Heydər Əliyevin siyasi irsini yaşadır. Onun adı tariximizin ən parlaq səhifələrində əbədi olaraq qalacaqdır.


Əhmədov Mustafa
8 saylı Regional Meşə Təsərrüfatı Mərkəzinin direktor əvəzi