Pensiyaya çıxan şəxslər zamanla həyatlarının yalnız ev mühiti ilə məhdudlaşması və sosial çevrədən uzaqlaşma riski ilə üz-üzə qala bilərlər. Bu isə maraq dairəsinin daralmasına və həyata olan həvəsin azalmasına səbəb olur.

Bu vəziyyətin qarşısını almaq üçün düzgün hobbi seçimi mühüm rol oynayır.

Məlumata görə, əl işləri ilə məşğul olmaq yaşlı insanlar üçün ən faydalı fəaliyyətlərdən biridir. Toxuculuq, tikmə, skrapbukinq, almaz mozaika kimi məşğuliyyətlər xırda motorikanı inkişaf etdirir və beyni aktiv saxlayır. Xüsusilə toxuma zamanı ilmələrin sayılması və sxemlərin izlənməsi beynin passiv qalan hissələrini işə salır.

Bundan əlavə, mütəxəssislər yaşlı insanlara yeni mətbəx texnikalarını və müxtəlif qadcetləri öyrənməyi tövsiyə edirlər. Multibişirici, yoqurt hazırlayan cihazlar və dondurma aparatları kimi texnologiyaların mənimsənilməsi onların müasir dünyadan geri qalmadıqlarını hiss etmələrinə kömək edir və zehni fəaliyyətlərini gücləndirir.

Digər tərəfdən, şahmat və dama kimi stolüstü oyunlar oynamaq, pazllar yığmaq da beyin üçün effektiv məşq sayılır. Bu cür fəaliyyətlər düşünmə qabiliyyətini artırır və yaşla bağlı problemlərin gecikdirilməsinə kömək edir.

Ekspertlər həmçinin kitab oxumağı, müzakirələr aparmağı, film izləməyi və musiqi dinləməyi də tövsiyə edirlər. Bu fəaliyyətlər insanın dünyagörüşünü genişləndirir, müsbət emosiyalar bəxş edir və beyni daim aktiv saxlayır.

Fiziki aktivlik də unudulmamalıdır. Mütəxəssislər mütəmadi olaraq idman hərəkətləri etməyi, gəzintiyə çıxmağı və sağlamlaşdırıcı prosedurlardan yararlanmağı məsləhət görürlər.

Araşdırmalar da bu tövsiyələri təsdiqləyir. Yapon alimlərinin apardığı tədqiqata əsasən, həftədə ən azı bir dəfə evdə yemək hazırlayan yaşlı insanlar demensiya ilə daha az qarşılaşırlar. Nəticələrə görə, bu vərdiş kişilərdə riski 23 faiz, qadınlarda isə təxminən 30 faiz azaldır.