Zəfər Günü Azərbaycan xalqının azadlıq mübarizəsinin, milli qürurunun və tarixi ədalətin bərpasının simvoludur. 8 Noyabr 2020-ci il tarixində əldə edilən qələbə ölkəmizin tarixində yeni bir mərhələnin başlanğıcını qoydu.

Uzun illər torpaqlarımızın işğal altında qalması xalqımızın qəlbində dərin yaralar açmışdı. Doğma yurdlarından didərgin düşən insanların qayıdış arzusu, torpaqlarımızın azad edilməsi ümummilli məqsədə çevrilmişdi. Vətən müharibəsi bu arzunun gerçəkləşməsi istiqamətində tarixi addım oldu.

Azərbaycan Ordusunun göstərdiyi qəhrəmanlıq bütün dünyaya bir daha nümayiş etdirdi ki, Vətən torpağı xalqımız üçün ən müqəddəs dəyərdir. Əsgər və zabitlərimizin döyüş meydanında nümayiş etdirdiyi cəsarət, fədakarlıq və yüksək peşəkarlıq Zəfərimizin əsasını təşkil etdi.

Bu qələbə həm də Azərbaycanın beynəlxalq mövqeyinin möhkəmlənməsinə, dövlətimizin gücünün və siyasi iradəsinin nümayişinə xidmət etdi. Ölkəmiz öz ərazi bütövlüyünün təmin olunması istiqamətində mühüm tarixi nəticə əldə etdi.

Bu gün Zəfərin davamı olaraq azad edilmiş ərazilərimizdə genişmiqyaslı quruculuq işləri həyata keçirilir. Qarabağda və Şərqi Zəngəzurda yeni həyat qurulur, tarixi və mədəni abidələr bərpa edilir, insanlar doğma torpaqlarına qayıdırlar.

Zəfər Günü münasibətilə hər bir azərbaycanlını ürəkdən təbrik edir, ölkəmizə sülh, sabitlik, inkişaf və tərəqqi arzulayırıq. Qoy Azərbaycanın Zəfər salnaməsi daim yeni uğurlarla zənginləşsin!


Aydın Rəhimov,
Abşeron-Xızı Regional Təhsil İdarəsinin rəis müavini