Yaxın Şərqdəki vəziyyətlə əlaqədar "Formula-1" üzrə dünya çempionatının Bəhreyn və Səudiyyə Ərəbistanındakı Qran-pri mərhələləri ləğv edilib.
Müvafiq press-reliz yarışın rəsmi saytında dərc olunub.
"Formula-1"in bəyanatında qeyd olunub ki, bir neçə alternativ variant nəzərdən keçirilib, lakin regiondakı vəziyyətin diqqətli qiymətləndirilməsindən sonra təşkilatçılar aprel ayında heç bir əvəzləmə etməmək qərarına gəliblər. "Formula-2" raundları da baş tutmayacaq.
"Bu, çətin bir qərar olsa da, təəssüf ki, Yaxın Şərqdəki mövcud vəziyyəti nəzərə alaraq hazırkı mərhələdə doğru addımdır", — deyə "Formula-1"in prezidenti və baş icraçı direktoru Stefano Domenikali yarışların ləğvini şərh edib.