31 Dekabr tarixi Azərbaycan xalqı üçün xüsusi məna daşıyan, milli birlik və mənəvi bütövlüyümüzü ifadə edən əlamətdar gündür. Bu gün dünyanın müxtəlif ölkələrində yaşayan milyonlarla azərbaycanlının eyni Vətənə, eyni dəyərlərə və ortaq milli kimliyə bağlı olduğunu nümayiş etdirir. Dünya Azərbaycanlılarının Həmrəyliyi Günü xalqımızın birliyinin, gücünün və sarsılmaz iradəsinin rəmzidir.

Bu əlamətdar gün bizə göstərir ki, məsafələr uzaq olsa da, qəlblər birdir. Dilimiz, mədəniyyətimiz, tariximiz və dövlətçiliyimiz azərbaycanlıları bir amal ətrafında birləşdirir. Milli həmrəylik ölkəmizin gələcəyi üçün ən möhkəm dayaqdır və bu birlik Azərbaycan adının dünyada daim uca tutulmasına xidmət edir.

31 Dekabr həm də Yeni ilin astanasıdır. Yeni İl yeni ümidlər, yeni arzular və yeni hədəflərlə yadda qalır. Geridə qalan ildə əldə olunan uğurlar dəyərləndirilir, qarşıdan gələn il üçün daha böyük məqsədlər müəyyən edilir. Hər yeni il xalqımıza sülh, rifah və davamlı inkişaf arzusu gətirir.


İlqar Nəzərov