İnsan həyatında unudulmayan şəxslər sırasında müəllimlərin xüsusi yeri vardır. Uşaqlıq və yeniyetməlik illərində bizə bilik verən, səhvlərimizi düzəldən, uğurlarımıza sevinən və çətin anlarımızda dəstək olan müəllimlər yaddaşımızda ömür boyu yaşayır.

5 Oktyabr – Beynəlxalq Müəllimlər Günü məhz belə insanların əməyinə ehtiram göstərmək üçün qeyd olunur.

Müəllim üçün ən böyük sevinc onun şagirdinin uğurunu görməkdir. Şagird ali məktəbə qəbul olduqda, müsabiqədə qalib gəldikdə, peşəsində uğur qazandıqda və ya cəmiyyət üçün faydalı bir şəxsə çevrildikdə müəllim öz əməyinin nəticəsini görür.

Bəzən bir şagirdin uğurunda illərlə davam edən böyük zəhmət dayanır. Müəllim həmin uşağın zəif olduğu mövzunu dəfələrlə izah edir, səhvlərinə səbrlə yanaşır, onu ruhlandırır və özünə inanmağa kömək edir. Şagird isə illər sonra həmin müəllimin verdiyi məsləhətlərin həyatında nə qədər əhəmiyyətli olduğunu anlayır.

Müəllim həm də cəmiyyətin mənəvi tərbiyəsində mühüm rol oynayır. Dürüstlük, əməksevərlik, böyüyə hörmət, kiçiyə qayğı, vətənə və dövlətə bağlılıq, insanlara mərhəmət kimi dəyərlərin formalaşmasında məktəbin və müəllimin rolu böyükdür.

Bu səbəbdən müəllim əməyinə münasibət yalnız tədris nəticələri ilə ölçülməməlidir. Müəllimin yetişdirdiyi insanın xarakteri, davranışı, həyata münasibəti və cəmiyyətə verdiyi töhfə də onun fəaliyyətinin nəticəsidir.

Bu əlamətdar gündə illər əvvəl bizə dərs deyən müəllimlərimizi xatırlamaq, onlara zəng edib hal-əhval tutmaq və sadəcə “Sizin sayənizdə çox şey öyrəndim” demək belə böyük mənəvi dəyər daşıyır.

Müəllimlik elə bir peşədir ki, onun izi bir insanın həyatında deyil, bəzən bütöv nəsillərin taleyində görünür.

Təbrik edirik!

5 Oktyabr – Beynəlxalq Müəllimlər Günü münasibətilə bütün müəllimləri səmimi-qəlbdən təbrik edirik. Hər birinizə möhkəm cansağlığı, tükənməz enerji, səbir, ailə səadəti və pedaqoji fəaliyyətinizdə böyük uğurlar arzulayırıq. Yetirmələrinizin hər bir uğuru sizin üçün ən gözəl mükafat olsun!



Hafiz Kərimov
ATİAHİ-nın İsmayıllı rayon Komitəsinin sədri